Entamu de la Campala "200 años de soberanía popular asturiana"

Sat, 31 May 2008 12:06:41 +0100

Fai doscientos años n’Asturies hebo una de les revoluciones más
importantes de la so hestoria, güei escaecida. El 25 de Mayu de 1808 el
pueblu asturianu llevántase contra'l poder central y obliga a la Xunta
Xeneral a proclamase soberana, enviando embaxadores a Inglaterra y
declarando la guerra a Francia, creando enantes un exércitu y la bandera
actual col emblema “Asturias nunca vencida”.

Estos fechos, anguaño, tán escaecíos y nun s’atopen nes escueles,
institutos, llibros… Dende’l movimientu independentista asturianu queremos
facer alcordanza y actualizar estos valores polos que llucharon los nuesos
antepasaos, la capacidá d’acción y organización d’un pueblu que se
defendió d’un xigante europeu, valores qu’actualmente tan consumíos pol
desánimu y la desmovilización.

Fai 200 años, desixencies como la soberanía, fueron comunes pa esti
pueblu, güei, desixencies como la oficialidá,igües contra la estroza
ambiental, como les incineradores o Caliao, recortes de les llibertaes,
como’l xuiciu a los 14 imputaos nel xuiciu de Cangues d’Onís, o’l propiu
derechu de soberanía del pueblu asturianu, tán tapecíes pola clas política
gobernante y polo sos medios de (des)información. Nesti aniversariu tan
importante pa nós como Pueblu lluchamos pa que la nuesa hestoria nun
s’escaeza y pa qu'aquellos revolucionarios tengan l’agradecimientu que
merecen por defender unos valores d’igualdá, respetu y soberanía.

Güei ye hora de facer polo tuyo… ¡llucha!

Contautu: asturies1808@gmail.com

Comments